政情：蔡冠深賣大包 50蚊可睇韓星
音樂無分疆界，但唔同年紀人士鍾意聽嘅音樂就有好大分別。香港中華總商會永遠名譽會長蔡冠深為咗籌備一個喺十月二日舉行嘅青年音樂會，早前特登帶埋太太及個女，一齊去咗睇Mnet亞洲音樂大獎（MAMA）頒獎禮，親身了解吓依家啲年輕人鍾意聽啲咩類型嘅音樂。佢笑言入到會場內，立即覺得自己好似怪物咁，因為身邊個個都好後生。
驚又甩底 唔派免費飛
蔡冠深表示，過往佢幫手搞過好多文藝晚會，可以話係駕輕就熟，不過佢覺得年輕人先係社會嘅棟樑，所以今次決定改辦音樂會投其所好。經佢「實地考察」後，今次音樂會邀請咗內地、香港、新加坡、以及近年極受香港青年人歡迎嘅韓國歌手演出，其中兩個韓國男子團體更非常有名，門票推出一日就全部售罄，皆因票價只係象徵式分五十元及一百元兩種，學生想睇韓星唔使捱貴飛。
問佢點解唔乾脆免費派飛，佢就話以前搞活動派免費飛會有好多人「放飛機」，相反即使象徵性收番幾十蚊，啲人怕蝕底就多數唔會甩底，不過最重要係個活動本身吸引，否則免費都唔會有人嚟。