政府自二○○六年起分階段實施五天工作周，依家政府以至唔少公營機構都已經實施咗五天工作喇，不過立法會秘書處就至今未能實施五天工作。
原來呢個亦都係歷史遺留落嚟嘅問題，因為過往星期六一直都被當作工作天，議員就提出議案或修正案作出預告時，星期六都一樣會計算在內，如果要更改、唔計星期六就要修改議事規則，可以話係牽一髮動全身，所以話立法會要落實五天工作真係遙遙無期。
其實除咗涉及提交議案，依家立法會唔少事務委員會等會議都會喺星期六開會。好似之前立法會政制事務委員會就政改舉行公聽會，因為想表達意見嘅團體代表同市民眾多，結果唔止星期六要開會，仲要開到夜晚，而秘書處唔同部門嘅職員自然亦避無可避要返工。
另外，由於議員每一個年度加入各事務委員會嘅截止日期都係首次大會嘅前一個星期六，而今年就係下月十日星期六嘅中午十二點。秘書處已預料傳媒同議員都會好關心各委員會「入會」情況，所以已經預咗人手當日會處理同公布，真係辛苦晒秘書處嘅同事喇。
卓妮