中環出更：陳婉珊不斷創新 守住四代企業
俗語話創業難，守業更加難，所以點樣守住家業都係一門學問。利記集團日前就獲香港中華出入口商會頒發企業傳承，作為第四代傳人嘅集團行政總裁陳婉珊（Clara）就親身出席領獎，卓妮自然要問吓佢有咩心得。Clara就話，要不斷尋求創新，先可以延續上一代嘅成績喎。
中華出入口商會日前主辦第二屆進出口企業大獎頒獎禮，利記集團獲頒企業傳承獎。Clara話，公司已經有近七十年歷史，所以要不斷尋求創新，以延續上一代嘅成績。而佢公司會喺風險管理、金屬物料、檢查方法等方面用新方法，估計將來會有不少出埠機會，可以寓工作於娛樂添。而已經去過珠峰、南極等地方嘅佢就計劃緊去不丹玩，因為當地夠樸素，而且網絡較差，可以乘機放手，畀員工一個挑戰、學習嘅機會喎。
鄭重科追上科技步伐
而獲頒電子商貿獎嘅星輝新發展有限公司鄭重科（Tony）就話，佢哋嘅印刷廠由早年傳統印刷發展為互聯網印刷，可以話係追上科技發展嘅步伐，而為咗提高生產效益，廠房更由晚間運作改為廿四小時運作，仲印埋兒童刊物。佢解釋，雖然兒童刊物發行量比以往少，但變化大，可以推出唔同款式同版本，加上家長唔想仔女太早接觸電子產品，所以估計印刷業仲有得做。
育有三歲半嘅囡囡同九個月大囝囝嘅信義玻璃執行董事李聖根好認同Tony講法，話要等小朋友大啲先會畀佢哋用電子產品。而佢一對仔女目前都只會睇實體書，至於幾時畀佢哋用電子產品，佢就話未同太太討論過喎！雖然佢暫時唔畀仔女接觸咁多電子產品，但生意方面佢就樂意跟隨科技趨勢。佢透露依家考慮緊發展線上接單服務，仲話唔發展線上服務，怕落後於競爭對手喎。
卓妮