美國前總統列根講過，政府唔能夠解決問題，因為政府本身就係最大問題。冇錯嘞，鉛水風波爆發接近三個月，港府追查「鉛兇」至今未有下文，而中招嘅市民就愈來愈多，搞到人心惶惶。咁就難怪，「東方報業民意調查」顯示大部分市民批評港府無能，處理危機頭痛醫頭，拖咁耐都搞唔掂，直頭累人累物喇。
即係咁，為咗調查鉛水源頭，港府係威係勢，水務署、房委會以及特首委任咗獨立委員會，兵分三路，好大陣仗(口架)。可惜吖，三個和尚冇水飲，多人管即係無人管，調查工作如泥牛入海，邊係做嘢(口架)。好似獨立委員會，聲稱要花九個月先至能完成報告，已經畀人話慢過烏龜，首場聆訊仲要拖到下個月底至進行，報告能唔能夠如期出爐，真係好難樂觀。你話嘞，民急官唔急，旨意港府保障市民食水安全，係咪嘥氣吖。
大家有眼見，鉛水危機爆發以來，港府十足十盲頭烏蠅咁，踢一踢郁一郁，完全落後於形勢。係人都知，鉛水對兒童威脅最大，嚴重嘅有可能影響智力發展，絕對唔係講玩，港府照計應該優先為學校驗水，點知人稱「唔得掂」嘅教育局局長吳克儉第一反應竟然係耍手擰頭，直到陸續有學校發現鉛水，喺巨大民意壓力下，至死死氣宣布為全港幼稚園同部分中小學驗水，結果真係有幼稚園出事。好多受訪市民批評官僚無能，進退失據，一啲冇鬧錯(口架)。
進退失據都算嘞，最離譜係連補鑊都補到甩甩漏漏，唔湯唔水。針對鉛水屋邨，當局淨係安排包括孕婦同嬰兒在內嘅三類高危人士驗血，對其他居民不聞不問，擺明大細超。咁都唔止吖，鉛水屋邨愈揭愈多，全面更換喉管唔知要搞幾耐，當局惟有為居民加裝濾水器，叫做頂住檔先。問題係，好多市民對濾水器同樣冇信心，寧願每日到街喉攞水，辛苦啲都在所不計。有人建議一併抽驗濾水器食水，當局係咪應該考慮吓呢。
所以話，頭痛醫頭，腳痛醫腳，始終都係治標不治本。嗱，已經有公屋承建商承認採購焊料監管粗疏，根本無規定必須採用無鉛物。家陣鉛兇呼之欲出，就睇當局係咪追究到底，堵塞漏洞。如果又係高高舉起，輕輕放下，市民實唔肯過你。
民意昭昭明甚，受訪市民幾乎一面倒狠批港府監管食水安全不力、補救措施慢半拍，先至係鉛水風波愈揭愈大嘅罪魁禍首。成日話一滴水睇穿整個世界，其實一場鉛水危機，何嘗唔係港府得過且過、麻木冷血嘅寫照呢。