政情：退黨潮難擋 乳鴿紛離巢
政改方案否決後，泛民政團因立場路線及選舉利益等問題，接連出現退黨潮。首先係公民黨有立法會議員湯家驊離巢，並另組智庫「民主思路」。之後民主黨（白鴿黨）繼前立法會議員黃成智被革除黨席後，另一同屬溫和派嘅元老狄志遠，早前亦正式退黨再另行組黨。就連黨友人數本已唔多嘅地區政團新民主同盟，亦有沙田區議員容溟舟退出。
麥潤培指無暇參與黨務
最新一次又輪番到白鴿黨，而且一走就走七個，包括沙田區議員麥潤培等多名八十後同九十後「乳鴿」。
早前白鴿黨中委會否決麥潤培以該黨名義參選區議會，麥亦自行將各類宣傳品「去白鴿化」，大家已估計佢遲早離巢。尋日佢喺社交網站上載咗佢封退黨信，指近日忙於地區工作及開拓網上平台，參與黨內工作時間已大減，為免影響黨務發展唯有退出。
與麥潤培一同退黨嘅，仲有鄺智揚、鄺美娜、徐嘉輝、宋寶欣、李志宏及黃浩鋒等六隻「乳鴿」。民主黨回應指，已收到有關退黨申請，中委會稍後會開會處理。