中環出更：泛民「雙何」被寸（火羅）爆論壇
中聯辦主任張曉明早前提出特首地位超然於三權之上，社會即時議論紛紛。泛民立法會議員何俊仁（AV仁）尋日出席電台節目《城市論壇》時就話「超然」同「三權之上」唔係法律字眼，可以用唔同方式定義，亦可套入個人睇法，唔可以亂用。佢嘅言論即刻畀同場嘅立法會議員謝偉俊（Paul）寸爆，話正如AV仁係超級區議員，都唔代表佢係超級，係大家講下之嘛，分明打蛇隨棍上，嘲笑AV仁得個名。
超級區議員唔代表超級
AV仁尋日話「超然」唔係法律字眼，唔可以亂講，而特首而家唔受《防止賄賂條例》第三條規管，覺得唔同事實都反映特首有超然地位，又話現有制度對特首嘅制衡不足，只要有直接選舉同民主選舉特首先可以受選舉制衡喎。Paul即刻寸AV仁，話正如AV仁係超級區議員，都唔代表佢係超級。而立法會議員田北俊亦反駁，「你（AV仁）反對咗個政改方案，（通過咗）畀五百萬人選咪無事囉！」面對兩方夾擊，AV仁即時無力招駕。
同屬泛民嘅立法會議員何秀蘭（Cyd）亦難逃被窒，台下發言時就有年輕人點名批評佢作為反對派同泛民會議召集人竟然成立同中央溝通四人小組，又質疑泛民一面話要取消功能組別，一面又容許屬功能組別嘅教育界議員葉建源做小組成員，認為泛民要制衡就唔可以講溝通喎。
卓妮