有人話，時間係一面鏡，可以令人睇到好多嘢，咁佔領行動就快踏入一周年，大家又睇到啲乜呢？睇到嘅嘢就多咯，港府無能，政客無恥，法治崩壞，香港沉淪，總之就係烏煙瘴氣，群魔亂舞喇。
嗱，提起法治崩壞，就唔可以唔提大功臣港府嘞。佔領之亂落幕咁耐，當局就姑息養奸咁耐，執法放軟手腳，檢控慢條斯理，莫講人稱「淫賤黎」嘅壹淫媒老闆黎智英等幕後黑手同搞手至今逍遙法外，連其他魚毛蝦仔都捉唔到幾多隻，咁樣嘅法治簡直係笑話喇。難怪「政治主教」陳日君大講風涼話，話為自己逍遙法外而感到「慚愧」喎，擺明諷刺法律面前人人不平等。所謂人必自侮而後人侮之，港府自閹，有法不執，呢啲咪叫自取其辱囉。
當然喇，香港淪落到今日嘅田地，除咗因為港府無能，亦因為政客無良又無賴。大家有眼睇，班妖孽當初喺佔領之亂鬥搶主導權，到行動失敗就鬥卸膊，其中兩名發起人戴耀廷同陳健民日前話喎，學生唔肯提早退場，因而耗盡公民社會力量，要求年輕一輩反思。淫賤黎更無賴，大鬧學生組織「戇居」，仲自爆曾經想勸學生退場而食檸檬添。嗱，呢啲咪就係狗咬狗骨囉。
冇錯，社會愈來愈政治化，部分年輕人行為激進，又主張勇武抗爭，又圍堵衝擊，仲狼到自製炸彈添，直頭伊斯蘭國咁款。不過咁喎，如果唔係班牛鬼蛇神唯恐天下不亂，發起乜嘢佔領行動，學生又點會變成好勇鬥狠嘅街頭鬥士吖？又點會淪為迷途不返嘅政治炮灰吖？戴耀廷同淫賤黎等人顛倒是非，將佔中失敗嘅責任全部推落學生身上，簡直不知羞恥為何物，唔怪得被人鬧下流無恥喇。
話時話，戴耀廷做佔中逃兵，一味卸膊，都唔係新聞咯。呢，佢曾經信誓旦旦講過會承擔法律責任，將來被控時唔會抗辯，亦唔會請律師，會欣然接受「公民抗命」帶來嘅後果，點知家陣自打嘴巴，揚言如果港大炒佢魷魚，就要向國際社會交代，變相威脅校方唔可以郁佢。你話係咪厚顏無恥吖，佔領之亂搞到香港幾乎萬劫不復，又唔見佢哋向市民交代！
都係嗰句喇，愛國愛港冇運行，洋奴漢奸有人撐。戴耀廷口中嘅所謂「國際社會」，咪就係外部勢力囉，班牛鬼蛇神之所以有恃無恐，正正因為背後有洋人撐腰，阿爺固然畏首畏尾，港府呢隻病貓更加連腳仔都軟埋。淫賤黎話唔怕坐監，最怕判社會服務令洗廁所，講到鬆毛鬆翼，仲唔係睇死港府唔敢郁佢咩。
計功夫茶話齋，打鐵還需自身硬，阿爺同港府對班牛鬼蛇神冇符，仲講乜嘢特首地位「超然」吖，「超軟」就差唔多！