取消強積金對沖機制傳聞最近又掀起商界和勞工界的爭議，飲食界立法會議員張宇人已連日提出反對，繼日前表明會「拉布」反對取消強積金對沖機制後，尋日出席電台節目時又再炮轟工會不停「打僱主荷包」，係把中小企的肉「一忽忽」割下來、凌遲式處死，仲話「攞埋啲蛋嚟食，仲邊有雞吖」，認真誇張。其實香港係自由市場，有議員就認為中小企「一雞死，一雞鳴」，汰弱留強，或換過其他經營者，依然撐起經濟，打工仔不愁無工做。
