政情：謝偉俊嘮嘈 又想做主席
建制派內部就立法會各事務委員會嘅正副主席之爭可以話一波未平一波又起，以司法及法律事務委員會主席為例，本身係大律師嘅商界議員廖長江同議員梁美芬都未傾掂數，同樣都係法律界出身嘅議員謝偉俊（Paul）又話有意競逐。Paul話，做副主席就如花瓶，根本無意思，仲不點名批評某啲建制派大黨忽略佢感受，似乎好大怨氣。
明言某大黨忽略自己
Paul尋日就呻自己從未做過委員會主席，反觀有建制派議員做第一屆議員就做主席，佢自嘲可能係因為佢過往無乜點出聲、無政黨同唔識玩嘢。問到係咪覺得有政黨太霸道，阿Paul就話唔會用霸道形容，但就明言某啲大黨忽略佢嘅感受，因為佢已經多次講過想做委員會主席。而除咗司法委員會主席，佢對經濟、政制、保安等事務委員會主席職位都有與趣，唔通Paul暗示做唔到司法委員會主席就會向呢啲範疇埋手？
另外，Paul又話英、德等優質民主國家唔會出現大黨蝦細黨，佢建議不如畀議員梁國雄都做下主席，「可以試下畀啲頑皮學生做班長」。佢真係妙想天開。