中環出更：義唱扶「腦」 AO歌王退休仲忙
城中名人不時為慈善獻唱，日前仁愛堂舉辦每年一度的名人名曲慈善演唱會，主席史顏景蓮（Kimmy）今年就請了早前開過個人演唱會的民政事務局前常任秘書長「ＡＯ歌王」楊立門一齊合唱。楊立門太太仲笑言，丈夫退咗休之後成日都要演出，仲忙過喺政府，好在丈夫多數打天才波，甚少喺屋企練習，佢先唔使被迫日日聽演唱會咋！
Kimmy就話，今次活動主題係「愛常在」，由於長者數目不斷增加，「認知障礙症」將會成為最受關注的疾病之一，為咗令有經濟困難的患者及家人可以把握患者黃金治療機會，佢哋會提供半價至免費的相關訓練活動及預防資訊。而一班政商名人為配合主題籌款更可謂法寶出盡，副主席陳明耀特地訂造咗一條印滿心心嘅領呔，又戴上心形眼鏡同頭飾，吸引在場唔少嘉賓爭相合照。
單日堅退而不休頻出埠
講到認知障礙，好多人都覺得退休後個腦突然真空會好容易退化，但剛退休一年嘅懲教署前署長單日堅就肯定冇呢個問題喇，事關佢積咗一大堆旅行目標，繼早前首次去完台灣環島遊後，最近又同太太去咗波蘭奧斯威辛集中營，令佢感受極深。佢話覺得東歐治安還好，但建築物顏色相對單調，與俄羅斯色彩繽紛的建築物對比甚大。
同場仲有副主席李愛平，原來佢之前坐郵輪因為天氣問題而要改航線，由原定去日本沖繩同福岡，改往泰國及越南。不過，佢一心只係諗住喺郵輪上輕鬆吓，都唔介意目的地有改動，反正都係旅行，安全最重要喎。
卓妮