政情：防賄例規管特首 拖三年無下文

貪曾「貪盡海陸空、歎盡省港澳」的貪腐醜聞於一二年曝光，當中最廣為人知嘅係貪曾夫婦偕同多名本地富豪，喺三艘價值四億元嘅超級遊艇度過三日兩夜澳門豪華之旅；其後貪曾再被踢爆廉租深圳「禮賓府」，被質疑涉及利益輸送或延後利益。廉署其後立案調查，惟三年過去仍未有下文，而前刑事檢控專員薛偉成同現任刑事檢控專員楊家雄，被問到幾時先會就有關案件作出檢控決定時，都只係回答「very soon」，令人擔心案件最終「石沉大海」。

立法助避免貪曾醜聞重演

其實除咗貪曾案，將特首納入《防止賄賂條例》的建議同樣係拖足三年無下文。防止及處理潛在利益衝突獨立檢討委員會一二年曾建議立法，將《防止賄賂條例》第三條及第八條適用範圍涵蓋至特首，規定特首收受利益前要得到法定獨立委員會許可。當時仍係候任行政長官的梁振英，曾經承諾上任後會盡快及嚴格落實建議，但三年過去仍然未有聲氣，唔知係咪同他涉嫌收受澳洲上市公司UGL五千萬元有關呢？

事緣梁振英在二○一一年十一月廿七日宣布參選特首，但卻喺同年十二月二日與UGL簽合約，承諾支持該公司在亞洲擴展生意業務，並獲四百萬英鎊（約五千萬港元）作回報，事件曝光後遭受社會各界質疑。

不過，即使《防止賄賂條例》真係落實立法，亦無法追溯立法前嘅案件，照計如果今屆政府立法，最多都係規管下屆特首，所以除非現任特首要考慮甚麼特別原因，或是有意競逐連任，否則無法解釋為何不敢立法。事實上，立法可避免再出現類似貪曾嘅貪腐醜聞，還廣大市民一個廉潔嘅香港，睇唔到政府點解畏首畏尾不斷拖延立法。