政情：施榮恆亦走過北韓大地
最近有電視節目聲稱揭開北韓的真實一面，令當地再次成為城中熱話。原來東華三院前主席施榮恆（Ivan）早於八十年代已經常到北韓朝鮮做生意，每次均逗留約一星期，又指現時當地建築物與當年分別不大。
Ivan話，當年佢與遼寧省一間貿易公司合作，喺八十年代尾至九十年代初於朝鮮經營紡織品及布匹生意，當地亦不時會見到有日本商人搵當地人做西裝加工。當時佢哋每次去之前都要先於北京或廣州辦簽證，簽證批咗之後才訂機票於北京轉機過去，到埗後再經當地部門購買回程機票。而每日嘅行程，例如去邊間公司等，亦要一早安排好晒，無得更改，而打電話亦要預早安排。
細數飲食難忘事
提到印象最深刻嘅事，Ivan話係食早午晚三餐都要提前落柯打，話說有次夜晚應酬夜咗冇同酒店講定翌日早餐食咩，結果第朝起身就冇得再叫嘢食，要餓到食午餐。而當地嘅食物亦好清淡，都係食粥、鹹魚、泡菜等，但啤酒就由當年嘅一款變到依家六款咁多。佢仲笑言，事隔多年，有機會或會再去喎。