中環出更：自由黨唔敢派「人」爭掌內會
自由黨立法會議員張宇人（Tommy）日前高調表態，聲言有意競逐內務委員會主席一職，還獲一眾黨員表態支持。不過，口響咗幾日，一聽到建制派話要封殺該黨就腳軟，該黨榮譽主席田北俊尋日朝就喺電台節目上放軟態度話，如果Tommy唔夠支持就會放棄。點知Tommy下午隨即召開記者會，宣布放棄競逐內委會主席，因為發現自己唔夠支持票喎。其實該黨應該早知玩唔起，又何必當初呢？
田北俊尋日朝透露曾與中聯辦官員見過面，雖然話無討論過Tommy爭做內委會主席呢件事，但忽然放風話可能放棄爭位，大家都估該黨是受壓力而縮沙。Tommy下午見記者時，被問到放棄爭位係咪因為受到中聯辦壓力，佢就話自己唔識普通話，中聯辦嘅朋友都冇搵過佢講呢件事喎。
張：唔夠票支持 湊孫好過
Tommy仲話，自己想做內委會主席，主要係想接受新挑戰，又話眼見政府施政有困難，想幫政府喎。之後講到唔夠票支持，證明大家都覺得唔需要佢去幫手，咁樣佢可以慳番啲時間湊孫，唔使啲孫只係睇住電視叫爺爺。佢仲話，唔會因為無得做內委會主席而去選財委會主席，覺得好難接受，所以一係就做主席，一係就唔做。其實講咁多，都係想跌落地揦番拃沙啫。
卓妮