中環出更：青聯新搞作「幫你做老闆」
匯聚年輕商界精英的香港青年聯會（青聯）日前舉行第二十三屆會慶及會董就職典禮，范駿華接棒成為新一屆青聯主席，前主席霍啟剛則功成身退，榮升顧問團首席參事。副主席方面，吳傑莊由副主席升做常務副主席，而新鴻基地產執行董事郭基煇、觀瀾湖集團副主席朱鼎耀、玩具界顏明潤及蔡德昇則齊齊任副主席。
當晚一班青年才俊滿場飛不停合照，其中郭基煇更極受歡迎。原來有跑開馬拉松的郭基煇非常熱愛運動，仲係滑水愛好者，佢話正準備參加香港單車賽，現時一星期會抽時間練習兩次，相當認真。
霍啟剛蔡加讚談湊仔經
卓妮又見到霍啟剛同名譽副主席蔡加讚好好傾，唔通係討論緊湊仔經？之前啟剛講過話想盡量陪住小朋友度過成長期間每一個重要里程，卸任青聯主席後可以抽多啲時間照顧家庭。數數手指，啟剛個仔啱啱兩歲，加讚個女則剛一歲多，問佢兩個係咪準備要對親家，啟剛就即刻笑笑口話唔會，又開玩笑指好彩當年阿爸冇逼佢去相睇，如果唔係就娶唔到郭晶晶呢個好老婆喎，真係賣晒口乖。
范駿華話，好多本地青年都具有潛質及創意，希望透過舉辦唔同形式活動，可以提供更多發展機會，例如舉辦暑假實習計劃及「幫你做老闆－創業學習賽」，又與其他團體合辦「京哈冰雪體驗專列」，帶學生體驗內地唔同地方嘅環境及機遇。
卓妮