正所謂，一不離二，二不離三。民航處嘅醜聞愈揭愈多，愈揭愈臭，直頭係鑊鑊新鮮鑊鑊甘。呢嗱，話口未完又嚟嘞。
話說民航處一名管制主任為咗送女兒出國留學，尋日居然同太太送埋入禁區，仲施施然喺餐廳歎茶。最離譜嘅係，保安發現有人擅闖禁區後報警，呢名民航處高官仲死撐，話民航處人員有權喺非工作時間帶其他人士進入禁區參觀，自己有副處長批文喎。
咁都得？係人都知，機場禁區非同小可，保安措施密不透風，點可以好似無掩雞籠o架？其實，申請禁區通行證手續非常繁複，而且唔同種類通行證只能進入特定區域，冇可能求其開句聲就帶人自出自入咁兒戲。退一步講，高官即使依正手續，唔算違規，但民航處高層為咗方便自己人，亂批通行證，擺明係假公濟私，濫用職權，咁又該當何罪吖？呢，早排有位台灣軍人私自帶明星朋友參觀軍事基地，仲邀請對方登上阿帕奇直升機，事件曝光後，唔止畀全民鬧爆，仲受到處分添。
冇計喇，假公濟私係民航處嘅「優良傳統」，大家早就見怪不怪。最經典例子係民航處位於赤鱲角嘅總部大樓，耗資二十億元，本來已經畀人批評大花筒，裏面嘅裝修同設施仲要極盡奢華，唔止設有舞蹈室，仲有落地鏡面、扶手、音響器材等設施，拍得住專業水準咁滯。據聞民航處處長羅崇文嘅太太熱愛舞蹈，加上分屬同事，咪因利乘便整間舞蹈室畀佢盡情發揮囉。咁都未算吖，早前本報踢爆民航處將部分擴建地方闢作太極班場地，而咁啱得咁蹺，處長夫人又係常客之一，佢就體貼咯，弊在納稅人要替佢埋單呢。
所以話，上有好者下必甚焉，處長公器私用，手下有樣學樣，帶家人擅闖禁區冇乜出奇吖。人哋就話公而忘私，偏偏民航處官僚私而忘公，成日掛住搵着數，正經嘢就唔識做。好似採購新空管系統咁吖，搞到一鑊泡，大拿拿使咗十幾億元，問題多多，結果拖咗四年，到依家仲係測試階段，有排未用得。最奇怪嘅係，呢個空管系統全球得三個地方採用，其中印度機場更加係有彈冇讚，民航處千揀萬揀，偏偏揀着個爛燈盞，如果話採購過程冇蠱惑，三歲細路都唔信喇。
點講都好，民航處烏煙瘴氣，亂象叢生，早就淪為獨立王國，當局再唔整頓，遲早爆大鑊嘅咋。正如古人話齋，「國家之敗，由官邪也」，整頓官場，首先由民航處開始喇！