立法會下個月先復會，但各事務委員會正副主席嘅爭奪戰，已隨着自由黨飲食界議員張宇人揚言爭做內會主席而提早展開。其實建制派早前已協調好今屆最後一個立法會會期嘅正副人選安排，內會主席原定係由梁君彥續任，自由黨今次唔理協調爭位，難免會引起一場大混戰。
獨立議員謝偉俊（Paul）尋日就提出一個內會主席人選。Paul話，為免大家爭崩頭同傷和氣，可以考慮由民建聯前主席譚耀宗（譚sir）出任，仲話有傳譚sir將做下屆立會主席，做定內會主席可以熱吓身喎。雖然Paul呢個提議係想平息紛爭，但分分鐘引起更大爭議。因為譚sir做開政制事務委員會主席，如果貿然抽走佢，又要搵另一個人頂替，到時可能仲麻煩。另外，若下屆立會主席真係由譚sir做，即大會、內會主席都由民建聯包攬，唔合乎政治倫理，到時群情洶湧就真係盞搞。