政情：李兆基獲牛津頒授名銜
人稱「四叔」嘅恒地主席李兆基多年來捐助牛津大學，又資助香港學生到牛津大學進修。牛津大學尋日頒授四叔「牛津大學榮譽校長恩德堂」成員名銜，牛津大學校長賀慕敦同該校華頓學院院長馬健勳爵御用大律師仲特登嚟香港，出席尋日專為四叔舉行嘅名銜頒授典禮。
已捐助逾百港生負笈該校
頒授名銜典禮喺香港四季酒店舉行。唔講唔知，原來過去二十八年以來，四叔成立嘅李兆基獎學金已經捐助咗一百個香港學生到牛津大學華頓學院攻讀學士課程，當中唔少人已經成為商界、法律界同工程界翹楚。其中四十幾個獎學金得主尋日都有出席典禮，四叔亦有同部分獎學金得主傾偈。
四叔話，十分榮幸可以成為「牛津大學榮譽校長恩德堂」一員，見到各位李兆基學人依家已經獨當一面，感到非常欣慰，希望佢哋事業有成之後都可以做多啲善事，回饋社會咁話。