港產官僚無嘢叻，最叻就係吹水唔抹嘴。好似家陣外國興「智能城市」，今年施政報告就話要喺九龍東試點，聽講會引入智能交通燈以及手機泊車程式喎。聽落就幾吸引嘞，實際又係點呢？唔好意思，港府連最基本嘅公共無線網絡WiFi都搞到唔湯唔水，未學行先學跑，你話係咪得啖笑吖。
唔係潑冷水，有政黨針對本港公眾地方嘅免費WiFi網絡進行調查，近八成受訪市民批評覆蓋率不足，超過七成人認為應該增加WiFi速度同埋覆蓋率；另外一半受訪者擔心網絡安全。你話嘞，連WiFi咁簡單都搞唔掂，香港憑乜嘢學人搞「智能城市」吖？
話時話，本港公眾地方嘅WiFi速度慢如蝸牛兼安全成疑，早就唔係新聞咯。早排有外國手機保安公司發表報告，列出全球十五個高危旅遊地點，香港海洋公園排名第五。正如有專家提醒，市民使用免費WiFi時應打醒十二分精神，特別係避免使用毋須登入嘅網絡，同時避免透過公共WiFi登入網上銀行帳戶，避免資料外洩。
專家嘅建議唔係冇道理，不過講到登入公共WiFi令個人私隱外洩，似乎太過多慮喇。事關公共WiFi上網慢過烏龜，連能唔能夠登入網頁都成問題，又點樣洩密呢？審計署曾經抽查全港二十個公共WiFi網絡，結果發現好多得個睇字，有啲未能打開網頁，有啲甚至連服務都冇，問你服未！
講真，互聯網發展一日千里，WiFi服務落後，唔單止損害香港國際城市形象，面對南韓、新加坡、日本等地發展智能城市，香港更加難以同人競爭。唔使講咁遠，淨係鄰近嘅廣東省，網速已經快過香港多多聲。最諷刺嘅係，有外國網站測試全球一百三十個機場，喺十大最快WiFi機場中，香港居然榜上無名，簡直丟架。
正所謂，一葉落知天下秋。WiFi發展停滯不前，正正係本港科技落後於人嘅縮影。好簡單，淨係一個創科局都搞到滿城風雨，爭拗多多，唔知仲要拖到幾時。之所以搞成咁，政客阻頭阻勢固然係主要原因，而港府眼高手低，志大才疏，都要負上好大責任。係人都知，科研最重要係人才，香港產業結構單調，英雄無用武之地，加上社會愈來愈排外，人才又點會上門呢？冇人才又點樣發展創新科技呢？
正所謂，一步落後，步步落後。廿一世紀係資訊科技年代，香港落後人哋幾條街，再唔急起直追，想有運行都幾難！