政情：立會秘書處極速換喉化「鉛」
自從爆發鉛水風波以來，市民都聞「鉛」色變，就連立法會議員梁國雄（長毛）早前都自掏腰包為立法會大樓部分樓層驗水。不過，繼長毛自行驗水之後，秘書處亦都因應鉛水事件，更換大樓內嘅焊接喉管，等班尊貴議員唔使心慌慌。
立法會秘書處話，依家出事嘅主要都係含鉛接駁焊料，因應社會對食水水質嘅關注，已經向政府查詢。建築署就回覆秘書處，話整個添馬艦門常開工程包括立法會大樓嘅食水供應主要都係用不銹鋼喉管，並以螺絲或逼模嘅機械方法接駁，毋須焊接。
已通知餐廳承辦商驗水
不過，秘書處為咗審慎起見，都係再詳細檢查一次大樓，結果發現宴會廳廚房連接熱水爐嘅一段喉管有一個焊接位，而立法會餐廳廚房內嘅水管中亦都有部分係採用焊接方式安裝。秘書處已經即時將宴會廳廚房嘅喉管換返毋須焊接嘅不銹鋼物料，而佢哋亦都通知立法會餐廳承辦商，承辦商就話會盡快安排驗水喎。秘書處嘅效率比起政府快咁多，睇怕班議員都無得挑剔。