泛民主派喺議會嘅勢力愈來愈弱，若一六年嘅立法會選舉失利，泛民將會連關鍵嘅三分之一否決權都無埋。唔知泛民係咪想擺脫弱勢，尋日忽然傳出公民黨（公文袋）同民主黨（白鴿黨）將會喺明年立法會選舉之後合併，以令主流泛民出現單一最大政黨，有更多討價還價嘅本錢。不過，公文袋及白鴿黨高層都異口同聲Say No否認，講到咁實，如果將來又Say Yes就樣衰嘞！
有網上媒體引述消息指，公文袋同白鴿黨嘅核心成員已經喺今年六月、湯家驊退出公文袋之後，初步同意喺明年立法會選舉後，趁兩黨不少新面孔成為立法會議員嘅契機，正式商討合併。報道又話，兩黨部分成員仍對合併好有保留，唔單止話劉慧卿留任白鴿黨主席會成為「兩黨磨合嘅障礙」，更加認為乳鴿會有不滿，擔心公文袋成員會搶走佢哋出選立法會嘅機會。
講到合併，劉慧卿同公文袋黨魁梁家傑都矢口否認，卿姐更加Say「No！」而梁家傑就話，該黨執委會層次完全無人聽過呢件事，佢承認之前有人提過，但今次提呢個消息就覺得好奇怪喇。不過，「空穴來風，未必無因」，雖則今日兩黨都Say No否認合併，但佢哋最後會唔會又Say Yes合併，仍然有待時間證明。
卓妮