中環出更：企業家齊撐工廈變身藝術世界
貨車川流不息的葵涌工業區，尋日午後出現近百名西裝友，齊齊參加中華廠商聯合會（廠商會）喺一棟活化工廈地下舉行嘅「企業家的藝術世界」展覽開幕式。參展嘅多數係廠商會中人，包括永遠名譽會長楊孫西、常董司徒健，仲有鍾意影靚女相嘅永遠名譽會長尹德勝。同樣係攝影發燒友嘅廠商會會長李秀恒（Eddy）笑笑口話，以前會同尹德勝一齊去影相，但做咗會長後好忙，惟有暫時放低相機先喎！
副會長楊志雄（Johnny）一看到身兼賽馬會鯉魚門創意館香港陶藝工作室總監司徒健嘅三隻豬仔陶藝作品，如獲至寶，事關佢間耳機公司有位高層生肖屬豬，最喜歡搜羅豬仔擺設。Johnny笑稱，呢幾隻豬仔獨一無二，夠晒特別，送畀呢位高層一定好鍾意。Johnny咁有員工心，認真唔話得。
周彩紅教基層媽媽發揮創意
廠商會青委成員周彩紅（Rainbow）都展出色彩繽紛嘅畫作，佢係業餘畫家，亦創辦一間社企教單親基層媽媽畫畫及做手工藝，令佢哋閒餘可以做啲藝術創作，由社企喺網上出售幫補家計。Rainbow一見到廠商會婦女委員會名譽主席冼婁文英就密密傾，希望可以喺婦委會開班，培訓多啲人去做導師就好喇。
借出場地嘅Eddy見到咁多老友嚟捧場，認真開心。佢話喺工業區搞藝術展覽，係想話畀大家知，工業區除咗沙塵滾滾，亦可以好藝術。
卓妮