俗語話，一榮俱榮，一損俱損，睇吓香港旅遊業嘅慘況，就知道呢句說話一啲都冇講錯。隨着旅客持續減少，唔單止零售業步入寒冬，連主題樂園都冇好日子過，焗住要變陣自救。
話說即將踏入十周年嘅香港迪士尼樂園，入場人數一直比預期少，業績長期未能達標，特別係今年受到訪港旅客下跌、港匯強勢等不利因素影響，形勢更加惡劣。樂園行政總裁金民豪係咁講嘅，本財政年度成績唔理想，需待市場回復正常至可以復甦；佢仲話面對其他地區嘅競爭，樂園唔可以再做獨市生意，需要變陣求存喎。
講就係咁講喇，但幾時至可以復甦，同埋點樣變陣，仲要睇過至知。最大嘅危機係，上海迪士尼明年就落成，香港面臨內憂外患，都咪話唔大鑊。試諗吓，香港迪士尼做咗咁多年獨市生意都唔掂，以後多咗上海迪士尼呢個強勁嘅競爭對手，豈不是雪上加霜？上海迪士尼淨係首期就達到三百九十公頃，等於香港園區嘅三倍，兩者相形見絀，你話香港點樣同人競爭呢？
係人都知，香港迪士尼主要靠內地客支撐，上年度總入場人次有七百五十萬，內地客佔咗接近一半，上海迪士尼落成後，究竟仲有幾多內地人願意山長水遠幫襯香港，實在令人懷疑，如果淨係靠外地客及本地客源，遲早拍烏蠅都似。危機當前，香港迪士尼又有咩良方妙計呢？金民豪話喎，部分園區係香港迪士尼獨有，加上擁有十年管理經驗，相信有助維持競爭力。好明顯，呢啲不過係夜行人吹口哨，自我安慰咋。
本來呢，以中國地方之大、人口之多，完全可以容納兩個迪士尼樂園，香港及上海各有各做，根本唔係問題。弊就弊在香港社會愈來愈政治化，激進組織無事生非，一時「驅蝗」，一時「光復」，搞到唔少內地客避之則吉，旅遊及零售業遍吹寒風咯喎，主題樂園又點可能有運行吖。有內地網民已經講到明，上海迪士尼落成後，絕對唔會再來香港。呢啲言論雖然有靠嚇嘅成分，但隨着兩地矛盾不斷惡化，愈來愈多內地客對香港敬而遠之係不爭嘅事實，再咁落去，無論迪士尼樂園點樣變陣，點樣擴建，都好難扭轉劣勢囉。
講起唔知好笑定好嬲，當年港府為吸引迪士尼樂園落戶香港，不惜割地賠款，提供各種優惠，累積投資達二百六十幾億元，點知樂園咁多年來一直未有分紅，港府一分錢都收唔番，睇怕呢筆公帑都係凍過水咯，唔怪得有人話港府「喪權辱港」喇！