政制及內地事務局局長譚志源（Raymond）都真係幾黑仔，繼政改方案「甩轆」否決之後，又爆出選民登記風波。法院處理過千宗反對申請時，有法官狠批情況「近乎荒謬」，話依家嘅選民登記法例同反對機制唔合理，選舉事務處要喺唔夠一個月之內，處理十八萬宗新登記選民申請，而法庭更加只有九日時間處理過千宗反對聆訊，促請政制及內地事務局同律政司推動修例改善。現時選民登記機制爆出咁多問題要改善，睇嚟Raymond都有排頭痕喇！
