政情：李垂誼懷舊 古蹟獻樂韻
著名大提琴演奏家李垂誼（Trey）年少時體驗過考古工作，因此對古舊事物特別有感情。佢策劃緊十一月下旬為期五天嘅第三屆「樂‧誼國際音樂節」，當中有一日係走出演奏廳，安排幾位音樂大師到已列為古蹟嘅尖沙咀舊水警總部獻藝。Trey話，香港嘅舊建築好多都係無價寶，可惜生活匆忙嘅港人未能細賞，所以希望透過音樂會，令觀眾享受悠揚妙韻之餘，亦同時體會到舊建築之美。
李嘉齡：歐保育值港借鏡
Trey認為，舊事物唔一定等於落伍，若然貪新忘舊，就會失去本身嘅文化特色，於遊客眼中再無吸引力，所以佢力撐歷史悠久嘅電車及天星小輪。至於有份參與古蹟演奏嘅鋼琴家李嘉齡，就話歐洲人視老舊建築係歷史文化遺產，因此保存工作非常出色，往往可以做到一個城市之內嘅建築物新舊交雜而不失和諧，值得香港借鏡。