政情：趕陪妻產檢 郭榮鏗亂過馬路
法律界立法會議員郭榮鏗身為大律師竟然亂過馬路？卓妮尋日下晝喺中環目擊郭榮鏗於置地廣場對出，神色匆匆咁橫過皇后大道中走向都爹利街方向，但馬路兩邊圍晒鐵欄，明顯唔係行人過路線，而佢橫過馬路期間車來攘往，險象環生。究竟佢點解咁心急亂過馬路？原來係為咗陪太太產前檢查。
就快再做爸爸
郭榮鏗接受查詢時表示，因為尋日朝早喺中環參加講座，原定講座後陪太太去產檢，但奈何講座超時，令佢要匆忙趕去診所陪太太見醫生。佢又透露，小生命嘅預產期係今個禮拜，尋日係最後一次產檢，換言之佢喺呢幾日隨時再做爸爸。
已有一名六歲囝囝嘅郭榮鏗，一向都令小朋友保持低調，被問到就快出生嘅新家庭成員係男定女時，佢依然保持神秘。不過，佢就透露已為新成員諗好個名，亦已購買好嬰兒用品，一有好消息就會話畀大家知。