政情：平機會主席大把人啱做
平等機會委員會主席嘅遴選過程一直被民間團體鬧爆係黑箱作業，政府兩年半前「翻閹」人稱「廢鑊」嘅食物及衞生局前局長周一嶽（周一鑊）出任平機會主席，不但無助推廣平等機會及消除歧視，反而進一步深化平機會係「高官退休俱樂部」嘅形象。眼見周一鑊任內劣迹斑斑，政府終於知衰「補鑊」，前日突然高調宣布公開招聘下任平機會主席。其實年終有眾多高官退休，要搵人接手平機會主席根本不成問題，更加好過周一鑊多多聲，最緊要係唔好再佗衰平機會。
黃靜文曾被「獵頭」招手
現年六十八歲嘅周一鑊，掌管本港醫療衞生及食物安全政策時屢爆失誤，前年獲「翻閹」為平機會主席，月薪高至超過廿六萬元，但由佢主導下推出嘅政策爭議不絕。佢亦多次被批評立場偏頗，甚至「踩界」撐同志，搞到天怒人怨。如果政府要搵前高官接任平機會主席一職，最新鮮滾熱辣嘅有公務員事務局前局長鄧國威。鄧離職後接受電台訪問時曾自爆，原本打算做到一七年，相信有掌管十七萬名公務員經驗嘅佢，做平機會主席仍然有心有力。
政制及內地事務局前副局長黃靜文亦係另一名合適人選。據聞上次遴選平機會主席時，曾經有獵頭公司向佢招手，當時佢以自己太熟悉政府運作為由婉拒。其實佢擔任政制及內地事務局副局長時主責人權事宜，包括反歧視條例，期間同平機會有唔少接觸；加上佢做過一年幾中華廠商聯合會行政總裁，有高層管理經驗之餘，亦已經有足夠時間「過冷河」。
黎年公共行政經驗豐富
此外，前申訴專員黎年喺官場縱橫四十年，去年三月底已經離任申訴專員，亦有可能接手平機會主席。黎年曾經喺多個政府決策局及部門工作，包括九九年擔任廉政專員，之後返回政府擔任財經事務及庫務局常任秘書長，直至○七年退休；到○九年重出江湖任申訴專員至去年三月底，公共行政經驗相當豐富。講到底，平機會主席嘅合適人選大有人在，「叮走」周一鑊真係百利而無一害，一天都光晒！