中環出更：肥佬黎疑向三老鴿傳老美密令
壹傳媒集團前主席黎智英（肥佬黎）早前去咗美國「遊湖玩水」，點知一返香港無耐，尋日就同有「李漢奸」之稱嘅民主黨（白鴿黨）創黨主席李柱銘、白鴿黨立法會議員何俊仁（AV仁）及立法會前議員李永達三隻老鴿密會。話時話，仲有大約半個月就係佔領行動一周年，被指同外國勢力有千絲萬縷關係嘅肥佬黎，今次同三隻老鴿會面唔通就係受外國勢力差遣傳達密令，再密謀攪局？
鬼祟唔見得光 隨時又攪局
話說尋晚大約七點鐘，肥佬黎坐住自己架七人車返回何文田寓所，但七人車上就唔止肥佬黎一人，仲有李漢奸、AV仁同李永達。七人車到達肥佬黎寓所後，佢哋冇即刻落車，特登等到寓所道鐵閘關咗之後先至落車行入屋，認真鬼祟。見到佢哋幾個木無表情，似乎心事重重。
肥佬黎同幾隻老鴿一傾就傾咗兩個幾鐘，直至九點幾鐘，三隻老鴿先至坐番肥佬黎架七人車離開，直情密室談判咁款，就連搭車離開時車窗都要拉密窗簾，好似連外間微弱燈光都唔見得咁。唔通佢哋真係懷有不軌企圖，諗緊佔領行動一周年時點樣又再攪亂香港？
卓妮