中環出更：曹星如父子檔幫青少打氣
年輕人總有迷惘嘅時候，就算曾經係邊青都一樣可以成功。近年有團體積極協助年輕人培養不同興趣，例如跳街舞、玩滑板等，甚至成為佢哋嘅職業，搵到屬於自己嘅出路。香港首位職業西洋拳拳擊手「神奇小子」曹星如日前出席活動時，就勉勵年輕人話，佢以前讀書成績都一般，曾經做過一段時間搬貨、跟車及倉務工作。
香港女律師協會及協青社早前舉辦「泰拳慈善夜」，曹星如罕有地同爸爸曹樹仁一齊現身觀賞慈善賽，替參賽嘅年輕人打氣。曹星如坦言，當年讀完中五後十分迷惘，唔知做邊行好，於是就渾渾噩噩咁打咗一段時間散工，後來遇到佢依家嘅經理人，先至開展西洋拳拳擊嘅職業生涯。
周伯展打壁球有罩護眼
到場支持嘅仲有香港醫學會副會長周伯展及律師何君堯等。講起拳擊運動嘅安全問題，周伯展話部分國家嘅醫生認為，呢種運動風險較高，但佢個人認為最緊要做足安全措施，風險就大大降低。佢作為眼科醫生，指因運動傷眼嘅病人中，最多係打籃球、羽毛球及壁球，所以佢打壁球時都會戴眼罩保護。
香港女律師協會前會長陳慧蕊兩年前開始打泰拳，仲因此瘦咗近廿磅，成個外表年輕晒，笑言兩個仔依家都好鍾意黐住佢出街。副會長黃琦雅就鍾情跳舞，話運動可以擴闊生活圈子。何君堯笑指人生最迷惘就係學生時代追女仔，而青春期做運動唔單止可以減壓同發洩，仲順便修身及有助發育。
卓妮