好花不常開，好景不常在。香港素以「好客之都」自居，旅遊業成為四大經濟支柱之一，可惜時移勢易，隨着激進組織不斷趕客，旅客紛紛避而遠之，今時今日已經冇呢支歌仔唱咯。正如「東方報業民意調查」顯示，多數受訪者認為本港旅遊業之所以走下坡，除咗受到內地經濟放緩同人民幣貶值等影響，反水客活動嚇怕旅客更係主要原因。
好簡單，激進組織唔係「驅蝗」，就係「光復」，搞到香港七國咁亂，有旅客肯上門至奇吖。尋日之嘛，上水又上演一場反水客大龍鳳，係人都怕怕喇。學似內地高官話齋，連串針對旅客嘅示威活動，已經傷害咗內地居民感情，要彌補唔係話咁易。
正所謂，一榮俱榮，一損俱損，旅遊業不景造成骨牌效應，零售、餐飲、酒店等相關行業亦受到牽連，齊齊步入寒冬。呢，本港七月零售銷貨價值又跌近百分之三，已經係連續五個月下跌，業界叫苦連天，愈來愈多商戶頂唔順，連以前其門如市嘅名牌店亦唔例外，唔係提早退租，就係關門大吉。業界話喎，依家嘅情況仲差過沙士時期，如果持續惡劣，個別舖位租金可能跌超過一半，吉舖潮亦會隨之而來。
唔使問阿貴，商戶經營困難，打工仔日子更加唔會好過。就講酒店業吖，旅客下跌，生意慘淡，唔少酒店惟有要求員工放大假甚至無薪假，如果情況再冇改善，跟住就係裁員嘅喇。正如上述民調顯示，近四成受訪者擔心打工仔淪為犧牲品，三成人就認為會造成骨牌效應。
係人都知，旅遊等相關行業佔本港經濟比重話就話唔係太大，但聘請唔少基層市民，對民生嘅影響絕對不容忽視。好多受訪者認為旅客人數持續下跌，唔單止反映旅遊相關行業步入寒冬，整體經濟更可能步沙士後塵而一蹶不振，唔係杞人憂天。
最搞笑嘅係，港府早前斥資八千萬元宣傳香港，大鑼大鼓催谷旅遊業，結果姿勢大過實際，只能稍為減少旅客跌幅，付出同收穫完全不成正比。鬼咩，香港趕客之都臭名遠揚，而港府又不思進取，一味等運到，點宣傳都冇用啦。難為有人仲要求內地開放更多個人遊城市，簡直係本末倒置，香港本身嘅問題都未搞得掂，開放更多個人遊城市咪盞添煩添亂，激化兩地矛盾。
西諺有云︰機會只會留畀有準備嘅人。香港要重新吸引旅客，首先要重拾好客之道，阻止激進組織繼續趕客，如果唔係，就算外圍環境點樣改善，內地點樣增加個人遊城市，都係嘥氣嘅咋！