政情：遭冒簽改住址 阿容報警
三名建制派現任區議員，包括元朗區嘅劉桂容（阿容）、荃灣區嘅林琳同南區嘅林玉珍，早前發現自己無故「被搬屋」，被人更改咗選民登記住址，隨時因而喪失角逐連任區議員嘅資格。三名女將之中，阿容同林琳都成功趕及喺限期前「搬多次屋」，重新更正登記住址，但事件至今仍係一個謎。
兩建制女將同趕及更正
結婚前居於天水圍天恒邨嘅阿容，早前發現自己嘅選民登記住址無故被搬回娘家，懷疑有人使橫手想令佢失去參選連任資格，好彩趕得切喺更正選民登記資料限期前一日改番。阿容尋日話，收到選舉事務處嘅回覆，證實喺四月底時有人冒認佢簽名填表更改住址，但等到六月尾先寄去選舉處，非常陰濕。由於事態嚴重，佢決定今日去警署報案。
林琳尋日喺社交網站張貼佢嘅最新選民登記資料，話「改番喇」。至於有同樣遭遇嘅林玉珍，我哋就暫時未搵到佢回應。