政情：財爺抽水又驚燒鬚
財政司司長曾俊華（鬍鬚曾）每周發表網誌係指定動作，有時大包圍乜都講一餐，有時就風花雪月不着邊際，而最新一篇就趕上「體育熱」，借備受外界關注嘅中港足球大戰「抽水」，大讚港隊門將葉鴻輝當日神勇表現，不負「英雄輝」之名。不過佢成篇網誌，都避談中港大戰前後衍生嘅中港矛盾議題，包括港隊被中國足協宣傳海報形容為「有層次」、葉鴻輝聲稱被國足隊隊長鄭智辱罵嘅風波等。唔知鬍鬚曾係咪擔心定位拿捏不準，寧可避重就輕當睇唔到呢啲爭論呢？
自嘲同曹星如打拳係「虐老」
鬍鬚曾喺呢篇網誌，終於冇再擦鞋大談「一帶一路」，亦冇講到香港市民最關心嘅樓、股、匯市變動，轉為講體育，連抽兩位香港傑出運動員嘅水。第一位被抽水嘅係外號「神奇小子」嘅拳手曹星如，鬍鬚曾自爆對方完成第十八場拳賽連勝嘅創舉時，佢都有到場打氣。佢又話，事後有網友喺fb提議佢用洪拳跟曹星如嘅西洋拳打番場，佢笑言呢個係「虐老」嘅提議，直言今日身體質素大不如前，技術亦已生疏，莫講話打一場，要佢捱曹星如一拳，後果都可能不堪設想。
鬍鬚曾之後轉為大談日前嘅中港足球大戰。佢話執筆之時，港隊於世界盃外圍賽對中國隊嘅賽事取得寶貴一分，其中葉鴻輝嘅神勇表現，果然不負「英雄輝」之名。佢續指，港隊於明晚主場迎戰強隊卡塔爾，無論勝負如何，都希望大家全力以赴，踢場好波，與現場球迷一同向世界展示港人嘅優秀質素同風格。
不提海報風波及辱罵疑雲
不過，對於有香港球迷喺早前嘅港隊主場賽事噓國歌，惹嚟國際足協去信要求香港足總關注；而中國足協喺官方海報中，用「有黑皮膚、黃皮膚、白皮膚，這麼『有層次』球隊」嚟形容香港隊，被指有種族歧視之嫌；以至葉鴻輝喺中港大戰賽後，聲稱曾被鄭智辱罵為「狗」嘅風波，鬍鬚曾就隻字不提，相信係避免抽水抽着火水，最後燒親自己。