尋日係開學日，莘莘學子放完悠長暑假，本來應該開開心心返去學校見番老師及同學仔，可惜喺呢個無能政府管治之下，香港亂象多多，無奇不有，連開學都搞到一鑊泡，學生點可能開心吖，簡直係「阿奇生阿奇，奇上奇」。
呢嗱，近日鉛水問題蔓延到多間學校，搞到人心惶惶。呢，尋日油麻地名校真光女書院又爆出有五個食水樣本鉛含量超標，包括學生飲水機，有一個樣本鉛含量竟然超標逾十倍咁多，你都咪話唔得人驚呀！
對於愈揭愈多嘅學校鉛水問題，教育局局長吳克儉話政府跨部門工作小組會作出討論，學校如需加裝濾水器，教育局亦會有津貼協助支付有關費用喎。淨係濾水器就可以搞掂？太天真嘞啩！
有名你叫「唔得掂」，吳克儉靠得住，真係豬乸會上樹。作為家長梗係自求多福，千叮萬囑叫佢哋嘅子女千祈唔好飲學校嘅飲用水，帶定多幾支樽裝水頂住先。問題係，學生嘅書包已經夠晒重，裝多幾公升水，隨時孭到腰痠背痛，影響發育都有之呀！
鉛水問題夠晒煩惱，尋日仲係唔少跨境學童嘅噩夢開始。多得當局實施所謂嘅「跨境學童專用校網」機制，話就話可理順北區派位亂象，結果搞到唔少跨境學童被派至離口岸冇雷公咁遠嘅東涌、馬鞍山，直頭係無良喇。老老實實，你試吓將政府總部搬去東涌，嗰班高官唔嗌到拆天至奇呀！
日日返學好似長征都算嘞，最慘就係數以萬計跨境學童要經由各口岸過關，由於現時口岸設施及交通配套不勝負荷，導致交通大擠塞，校巴大排長龍，其中三十多名喺青衣區就讀嘅跨境學童遲到將近兩粒鐘，差啲趕唔到開學禮添。
最離譜嘅係，吳克儉唔知攞景定贈興，居然話情況大致暢順。唔係啩，跨境學生喺關口逼到變沙甸魚，十足十走難咁款，咁都叫暢順？佢唔止「唔得掂」，直情係「好唔掂」!
講到底，一日都係貪曾當年種下禍根，跨境學童年年增加，皆因雙非問題尾大不掉，依家問題陸續爆煲，留個爛攤子畀現屆政府，仲引發中港家長矛盾，添煩添亂。市民叫苦連天，貪曾就拍拍籮柚飛去北京睇大閱兵，呢個世界就係咁荒謬。
當然喇，雖然話貪曾係始作俑者，但現屆政府亦有責任撥亂反正。弊在當局完全提唔出解決方案，面對雙非童回流問題漫不經心，淨係搞咗個跨境專屬校網敷衍了事，成班官僚後知後覺，得過且過，絕對難辭其咎。咪話功夫茶唔提醒，隨着雙非兒童陸續進入返學年齡，問題仲有排煩，唔該當局唔好再頭痛醫頭，腳痛醫腳，快快趣趣搞掂佢呀!