公民講場：協調混亂 高官「吳得掂」

好多人批評政府內部欠缺溝通，話口未完尋日又爆一單！教育局局長吳克儉（吳得掂）連日來表明唔會為學校驗食水，點知政務司司長林鄭月娥尋日一個屈尾十話要優先為全港約九百八十間幼稚園及八十間中小學驗水，等於摑咗吳得掂一巴。其實林鄭早有前科，今年六月初南韓爆發新沙士，食物及衞生局局長高永文宣布發出「旅遊健康建議」，性質類似「紅色旅遊警示」，點知翌日林鄭就高調宣布對南韓發出「紅色旅遊警示」，事後被指架空高永文。如果再係咁落去，除咗凸顯政府內部溝通混亂，同時令市民無所適從，究竟聽邊個官員講嘢至啱呢？