政情：過檔浸大 錢大康避講「首副」
尋日除咗係莘莘學子開學之外，浸會大學新任校長錢大康都正式履新，佢之前係香港大學首席副校長，近日港大副校長（學術人事及資源）遴選風波搞到滿城風雨，當然想聽吓佢有咩意見啦！點知佢就話第一日返新工，唔想談論其他院校嘅事。對於港大學生、校友嘅做法有無干預院校自主，錢校長依然拒答，仲話呢度係浸大，港大喺薄扶林，要問就問番港大喎。
唔少院校學生亦有聲音要求修改由特首出任校監嘅做法，錢大康亦曾經話呢個做法過時，上任後若社會認同要檢討，佢會同其他院校討論。不過，尋日佢被問到呢個問題時，口風就似乎改咗，話呢件係高教界嘅事，應該聽多啲意見，佢就無乜意見喇。唔通錢大康過咗海去九龍塘返新工之後，就同港大劃清界線？
話自己似小學生咁緊張
大學校長嘅政治立場一向好受外界關注，錢大康被問到日後會否做政協、人大代表時，佢就話自己唔屬於任何政治、政黨，仲話做校長期間，唔會參加任何非學術、非教育等公職。佢仲話，自己好似中小學生開學咁緊張同興奮，未來會同師生加強溝通。