中環出更：鐘錶轉型 抗零售業寒冬
訪港遊客下跌令零售市道走下坡，鐘錶業首當其衝。由香港貿易發展局、香港鐘表業總會及香港表廠商會合辦嘅全球最大鐘錶展將於下周二登場，尋日一眾業界名人齊搞宣傳騷。貿發局副總裁周啟良話，市道唔好唔使驚，事關有唔少中低價時款品牌冒起，有做代工嘅錶廠自創品牌，亦有時裝品牌授權生產時款手錶，轉攻鍾意換款襯衫嘅女士、甚至小朋友市場，所以市況唔好未必係壞事喎。
今屆鐘錶展籌備委員會聯名主席黃雅芝（Angie）好贊成，仲話有危亦有機。卓妮見周啟良戴住隻靚錶，又講到咁有信心，唔通佢成日換錶襯衫？佢話每年都會買新錶襯吓衫。咁佢太太係咪換款頻密過佢呢？點知佢話冇太太，Angie即笑佢係鑽石王老五，如果消息揚開去，相信會好搶手，到時城中又少咗粒鑽石喇！
機芯工藝 拍得住瑞士
鐘錶展籌委會聯名主席林偉雄就話，自創品牌唔容易，事關打響新品牌需要好大投資。同場嘅表廠商會名譽會長黎衍橋都冇自家品牌，但佢就用五年時間、投資超過兩億元鑽研機械錶機芯嘅製造技術，最近終於成功生產質素拍得住瑞士嘅機芯工藝，下周鐘錶展期間將正式宣布好消息。
現場有新面孔，天寶鐘表主席梁青華嘅細仔梁仲康啱啱由加拿大返港，依家喺公司幫手。卓妮見佢哥哥梁仲元同表廠商會副會長劉燊濤傾得好開心，原來兩人四年前同一日結婚擺酒，半年前劉燊濤搶先生咗個仔，難怪梁仲元笑稱壓力好大喇！
卓妮