公立醫院又開錯刀！冇錯嘞，之所以加個「又」字，皆因類似事故接二連三，屢見不鮮咯。
今次係咁嘅，一名男病人被東區醫院診斷患有「肺癌」，於是轉介到瑪麗醫院進行手術，點知切除四分一肺葉化驗後至發現擺咗烏龍，病人根本冇肺癌。呢件事聽落好似一個笑話咁，其實一啲都笑唔出，對於受害者嚟講，簡直係一場悲劇。
點解會搞成咁？東區醫院話喎，病人嘅肺部活組織樣本帶有另一名確診癌症病人嘅活組織細胞，即係話樣本可能受到交叉感染咁解。而港島東醫院聯網總監劉楚釗就指暫時未能確定邊個環節出錯，估計可能係抽取病人活組織樣本放入容器或將樣本送往實驗室時出現程序偏差。
咁都得？一句程序偏差，唔止害到病人提心吊膽，而且無端端捱咗一刀，以後仲唔可以進行劇烈運動添，有冇再離譜啲吖。嗱，食物及衞生局局長高永文亦承認，病人樣本交叉感染係非常嚴重嘅問題，醫管局有需要嚴肅跟進及詳細調查喎。
可惜吖，所謂嘅跟進及調查，咪又係例行公事，先成立調查委員會，然後提交一份報告，次次都係咁，一啲新意都冇。老實講，如果呢啲好似做騷嘅調查可以解決問題，就唔會發生咁多醫療事故喇。就講東區醫院吖，開錯刀已經唔係第一次，幾年前曾發生過左右不分嘅鬧劇，一名病人右膝受傷，醫生居然喺佢左膝開刀，卒之搞到兩隻腳都有事，你話係咪恐怖吖？
正所謂，冰凍三尺，非一日之寒，公立醫院管理混亂，醫療事故層出不窮，又點止開錯刀咁簡單吖，斷錯症、輸錯血、打錯針、用錯藥，簡直無奇不有。講到開錯刀，功夫茶諗起一則真人真事，話說籃球明星姚明有一次喺美國進行腳踝骨刺切除手術，事先特別喺患處畫咗個交叉，提醒醫生唔好開錯地方。所以話，小心駛得萬年船，美國醫院都令人信唔過，香港醫院更加唔使講，病人最好學姚明咁，手術前先做個記號，以免醫生左右不分，又搞出個大頭佛。
當然喇，好似呢單切錯肺事故咁，就算病人自己做咗記號都冇用，事關今次涉及連番出錯，首先係樣本交叉感染，跟住係斷錯症，最後係開錯刀，公立醫院烏龍百出，病人除咗任人宰割之外，仲可以做啲乜呢？有人統計過，全球大約四分一病人會被醫療失誤傷害。睇吓香港公立醫院嘅情況，就知道呢個講法一啲都冇誇張。
講到底，物壞蟲生，俗壞奸生。醫管局問題多多，千瘡百孔，公立醫院唔出事至奇吖！