中環出更：黃偉綸升任常秘 火頭有排撲
海事處處長黃偉綸又再接火棒，將會喺本月三十一日接替周達明，出任發展局常任秘書長（規劃及地政）。黃偉綸喺去年二月開始出任海事處處長，係首長級D6職位，佢亦都係回歸後首位空降嘅處長。當時佢已經做咗新聞處處長四年幾，想佢幫手處理南丫海難之後嘅海上安全工作。不過，佢只係做咗海事處處長約一年半，工作都未做完，就隨即被升去做發展局常秘D8位，處理另一個火頭。
未做過地政相關工作
其實發展局常秘（規劃及地政）呢個位都唔易做，轄下包括規劃部、市區更新及屋宇部、地政部，除咗要處理新界東北、洪水橋等多個發展計劃嘅棘手工作之外，仲要做埋城規會主席，即係要處理尖沙咀星光大道活化計劃，仲有機場三跑嘅申請，睇嚟真係火頭處處。相信都係因為黃偉綸一向都好醒目，先會再被委以重任，幫手拆彈。
睇番黃偉綸做過中央政策組、保安局及前經濟發展及勞工局等多個範疇，但統統都同土地政策無關，睇嚟都需時適應發展局嘅新工作。至於海事處處長個位，就會由政府物流服務署署長鄭美施接任，而土地註冊處處長周淑貞就會接任政府物流服務署署長。
卓妮