中環出更：飲食業招新血 廚房大改造
坊間有傳言話廚房熱辣辣，會影響男士嘅生育能力。不過，御苑皇宴執董黃傑龍（Simon）就話，旗下廚師個個都好多仔女，相信傳言未必係真，但廚房太熱確實令青年人入行卻步，搞到飲食業請人難上加難。為了改變現況，飲食界就推行綠色廚房，更換新式爐具，廚房冇以前咁熱，廚師工作環境大大改善。Simon日前就聯同稻香集團企業發展部總經理區鳳儀帶大家參觀旗下食肆嘅環保節能廚房。
Simon話，一般環保節能廚具表面上成本較貴，但其實回本好快，仲可以慳到三至七成媒氣或用電量，只要識計數就會發現好抵用。早前旗下食肆就安裝咗兩部綜合式熱泵，可以當作熱水爐用之餘，個熱泵仲會排出冷風，十足一部免費冷氣，廚房都涼快好多。佢又話，以前俗稱會「燒腳毛」嘅「矮仔爐」，依家嘅新爐具設計，就算企喺隔籬都唔會覺得熱，真係做廚都唔使擔心冇仔生啦！
無火煮食便利快捷
另一邊廂，區鳳儀就帶大家去睇旗下「鍾菜」開放式廚房，對於年輕人覺得做廚好辛苦，佢哋就諗到轉用無火嘅電磁炒爐及電熱蒸櫃等，煮出來嘅菜式一樣火候十足，而且電能煮食爐具容易操作，可以加快煮食速度，又可以減少廚師工作量，有效緩和飲食業唔夠人用嘅問題。
同場仲有綠色建築議會綠色食肆專責小組成員邱金榮及中電副總監林浩文，為咗示範及測試電磁炒爐可以直接傳熱到鑊內而熱力唔會四散，林浩文將一百元鈔票放在電磁炒爐及鑊底之間，師傅炒完餸之後喺鑊底拎返張一百元出嚟，依然乾乾淨淨絲毫無損。
卓妮