香港近年每況愈下，唔止經濟發展停滯不前，政治紛擾令人厭煩，生活質素更加跌跌不休，好似王小二過年，一年不如一年，呢，海外僱員對來港工作興趣缺缺，就係最有力嘅證明喇。
有國際調查機構今年訪問逾萬名派駐海外打工仔，選出全球最理想工作地點，香港風光不再，跌出十大位置不特止，仲大跌十六位至二十六名，反觀主要競爭對手新加坡愈升愈有，連升兩級至第四位，簡直無得比。至於最佳生活質素地區排名，新加坡憑住旅遊安全及交通系統便利兩大優勢榮升一哥，同屬亞洲四小龍嘅南韓排第十，而香港就重挫二十位，由第四位滑落到第二十四位，五成四受訪者直指本港樓價問題嚴重，相比舊年毫無改善。唯一令人稍為安慰嘅係，香港係受訪者眼中「賺得最多」嘅地區。
當局者迷，旁觀者清。海外僱員視香港為畏途，香港生活環境究竟退步到乜嘢程度，畫公仔唔使畫出腸喇。講真，今時今日嘅香港已經走晒樣，衣食住行樣樣難，生活質素不進反退，除非有被虐狂嘅啫，否則點會覺得香港係安居樂業嘅理想地方吖。特別係樓價高企問題，簡直係充滿香港特色嘅都市悲歌，喺一屋難求之下，私樓價格固然高到冇朋友，連公屋都賣到萬蚊一呎，咁搞法，莫講好多港人要住劏房，海外僱員隨時都會淪為港式貧民窟住客吖。大家話嘞，香港連最基本嘅居住問題都難解決，喺理想工作地點排名插水，有乜出奇啫？
話時話，香港施政混亂，烏煙瘴氣，嚇親人嘅又點止樓價吖。就講最近鬧到滿城風雨嘅鉛水風波，除咗公屋同私樓中招，連學校都不能幸免，市民連飲啖清潔食水都變成奢望，香港根本愧稱國際城市。至於空氣污染同食物安全危機就更加唔使講，回歸咁耐，警鐘響足咁耐，至今依然毫無改善，搞到市民生命健康飽受威脅。最令人不安嘅係，經濟民生停滯都算嘞，仲要社會愈來愈政治化，搞到家嘈屋閉，永無寧日，人人都敬而遠之喇。呢，《經濟學人智庫》早前公布最新全球宜居城市調查，香港排名插水式下跌至四十六位，呢啲咪係政治影響民生嘅惡果囉。
所以話，港府成日話要吸引人才，點知人才愈叫愈走，唔係冇原因o架。正所謂，良禽擇木而棲。香港政治氣氛愈來愈惡劣，社會環境愈來愈惡化，唔係宜居城市排名下跌，就係最理想工作地點排名插水，點可能吸引到人才呢？計功夫茶話齋，港府與其整色整水推出所謂嘅吸引人才計劃，不如盡快拆解房屋困局同改善施政，咁仲實際喇。講到尾，安居樂業係所有人嘅共同願望，香港繼續沉淪落去，何止海外僱員卻步不前，香港人爭相移民雞飛狗走添吖！