政情：「女信使」搶晒泛民風頭
近日多個泛民政黨輪流趕尾班車，去到位於灣仔嘅選舉事務處總部抗議，要求徹查及剔除多個區議會選區內嘅可疑選民登記，選舉處每次都會派職員接信，遞信團體循例都會影番張相，以便將來做工作報告之用。有眼利網民發現，前日負責替民主黨及工黨接信嘅選舉處女職員，由容貌以至衣着打扮都好省鏡，完全將兩黨嘅區議員或疑似區選參選人「技術性擊倒」。
據悉該名女職員姓關，英文名叫Hermia，即希臘文嘅「信使」、「信差」咁解，搵佢接信認真貼切。根據選舉處網頁資料，Hermia為該處行政組嘅助理選舉事務主任，個人Facebook有好多外國風情及美食相，反映佢鍾意旅行同食好嘢。至於尋日先去抗議遞信嘅泛民政黨就同Hermia緣慳一面，因為選舉處改派咗一名男職員接信。咁都好嘅，唔使再被人搶鏡嘛。
