政情：區議員跪官後中六合彩
俗語話「男兒膝下有黃金」，身為男子漢不能輕易下跪，但沙田區議員丘文俊早前喺全城清潔運動啟動禮後，竟然跪喺時任署理特首林鄭月娥座駕前請願，要求林鄭接收請願信及承諾為水泉澳邨居民全面驗水。雖然林鄭冇理會丘文俊，但佢呢一「跪」，真係跪出「黃金」喎！
話說跪地請願當日係丘文俊生日，面對跪地請願都冇人接信同理會，佢全日冇晒心機，佢太太就建議不如買張六合彩「沖沖喜」，佢於是買咗兩注六合彩電腦票。點知十年都冇買過六合彩，竟然畀佢一擊即中，中咗四個字，即五獎派彩六百四十元。丘文俊笑笑口話，總算攞番個安慰獎。如果佢下次向更高級嘅官員下跪請願，唔知會否中到頭獎呢？
