在政改方案投下反對票嘅立法會醫學界議員梁家騮（怪醫），唔少人估計佢喺明年立法會選舉不會競逐連任。據聞醫學會前會長蔡堅喺各方「黃袍加身」下，好大機會出選。而醫學界內亦流傳，○八年參選過嘅港大感染及傳染病中心總監何栢良及西醫工會會長楊超發可能會出選，加上佔領行動催生嘅醫學組織「杏林覺醒」內一班年輕醫生亦不排除加入戰團，醫學界勢面臨一場大廝殺。
有醫學界中人指出，早前醫學會會董改選，曾為佔中醫療隊召集人歐耀佳高票當選，醫學會內部就有聲音，建議不如就由佢出選下屆醫學界選舉，但據聞佢已經婉拒邀請，寧願花時間退休後全程投入無國界醫生工作。此路不通後，蔡堅於政改期間多次質疑醫學會會長史泰祖做完業界政改問卷調查後再做多次，是否想「轉軚」支持政改，而蔡堅亦多次表達有意出選，亦被睇高一線。
至於一班年輕醫生喺政改期間成立杏林覺醒，迫使醫學界反對政改方案。據聞佢哋現階段對參選意欲大不，因為呢班醫生正值當打時期，如果進入議會，就會減少時間發展專科資格，究竟是否值得如此犧牲，相信要計過度過，倘若一旦派人參選，預計選情會相當混亂。