政情：譚惠珠肅貪 不惜退黨
「貪曾」前特首曾蔭權爵士「貪盡海陸空、歎盡省港澳」嘅貪腐醜聞，以及壹傳媒集團前主席黎智英向泛民團體及議員秘捐醜聞，被查多時至今皆未有下文，外界對專責監督廉政公署處理重大貪污案件嘅審查貪污舉報諮詢委員會（審貪會）都抱有期望。事有湊巧，港府於去年底委任資深港區人大代表譚惠珠為新任審貪會主席，當時輿論反應不一，反對任命嘅原因包括譚惠珠有鮮明政治立場，加上係民建聯成員，因此有戒心。不過，消息指譚惠珠其實喺接任審貪會主席前，已低調地自行退出民建聯，似乎係為免日後要處理具爭議性事宜時節外生枝。
譚惠珠於政界打滾近四十年，曾出任多個政黨政團嘅領導層，其中港進聯於○五年與民建聯合併後，譚曾於民建聯出任副主席、會務顧問等職位，其民建聯背景亦為人熟悉，但外界亦因其鮮明政治立場，引起不少揣測及質疑。
有知情人士指，譚惠珠接任審貪會主席係順理成章，因佢於一○年開始加入審貪會出任委員，事隔多年已屬審貪會最資深嘅一批成員。據知譚惠珠去年底獲委任為審貪會主席前再有不為人知嘅動作，就係辭去所屬民建聯內所有職務，而且自行退黨，結束九年黨員生涯。
無政黨背景 非法律規定
據聞審貪會主席無政黨背景非法律規定，然而事實擺在眼前，近年不分建制、泛民政黨都不時到廉署舉報個案，況且貪曾嘅貪腐醜聞受到各界關注，黎智英秘捐醜聞更揭發泛民多個政黨都有成員牽涉其中。據知為免被人抽後腿質疑涉利益衝突，或被質疑未能做到不偏不倚，譚惠珠自行作出退黨決定。民建聯最新網頁資料亦顯示，一批有民建聯背景嘅港區人大、政協名單中，譚已榜上無名。
講到底，有人識考慮公眾觀感問題係一回事，審貪會最重要係實事求是，做好專責監督廉署處理重大貪污案件工作，否則市民看在眼內心中有數，由對新人事有期待轉變為失望之時，就恨錯難返。