中環出更：阿容登記地址被返娘家
更新選民登記資料限期尋日結束，曾在區議會選舉打敗立法會議員李卓人嘅昔日工聯會小花、現在榮升為「阿珠媽」（師奶）嘅元朗區議員劉桂容（阿容），於限期結束前夕意外發現，其選民登記地址「被自動」返回娘家。即係佢結婚後同丈夫搬至荃灣麗城花園居住，而且已更改選民登記地址，但竟然喺不知情下被人更改為婚前位於天水圍天恒邨嘅住址，認真離奇。
匿名人士修改
阿容話，今年初向選舉事務處更改選民登記地址至荃灣麗城花園，原本一直相安無事，豈料尋日再次翻查選民登記紀錄時，卻發現其選民登記地址被竄改返回天恒邨；加上該區現任議員係工聯會陸頌雄，佢擔心有人乘機惡意中傷，甚至質疑係「種票」個案。
就此阿容即時致電選舉事務處查詢，先發現有匿名人士於四月曾修改其選民登記地址，佢已第一時間撥亂反正，改番真實嘅選民登記地址，仲要求索取本年內同佢相關嘅選民登記文本嘅副本。好在阿容自行發現「被自動」返回娘家一事，否則被人爆料先知悉，就水洗都唔清嘞！
卓妮