今日香港通街騙徒，好似變咗老千之城咁，電話騙案固然防不勝防，去買嘢都一樣要打醒十二分精神，否則好容易破財嘅咋！
嗱，數字唔會呃人。《商品說明條例》實施兩年以來，海關共調查近一千三百宗個案，平均一日兩單咁滯，當中提出檢控及被法庭定罪嘅個案，分別有一百四十九及一百二十二宗，都咪話唔嚴重。淨係之前賣兩萬銀一支黑鬼油而「揚名立萬」、家陣已經摺埋嗰間黑店，海關已經接獲十三宗關於其天價貨物嘅投訴，問你怕未。
冇錯嘞，模糊標價正正係黑店劏客四大常用招數之首。有啲蠱惑藥房，貨品明明標價「19800」，但就故意喺「198」同「00」中間留出空位，等客人以為賣一百九十八元，咁咪有機會上鈎囉。第二招係誘客碌卡，店員訛稱信用卡找數有優惠，消費者唔為意，分分鐘被碌咗巨款都唔知。第三招係刻意混淆斤両，例如將個「両」字寫到有咁細得咁細博大霧，再唔係就以次充好，天喜堂天喜丸變天喜牌天喜丸，簡直係沒有做不到，只有想不到。
除咗藥房，健身中心同美容院亦係劏客重災區，好似有位女士幫襯美容院，被店員游說做身體檢查，仲話佢胸部有硬塊，如果唔參加療程會演變成乳癌，事主方寸大亂之下，簽咗十四萬元療程，好彩事後識得向海關投訴，先討回公道咋。
即係咁，無論黑店劏客點樣花樣百出都好，最緊要都係消費者自己醒目，對價錢有疑問，記得打爛沙盆問到篤，如果店員帶你遊花園，例如你問佢花膠幾錢両，佢就答你一斤等於十六両，唔使問阿貴，肯定有蠱惑，千祈咪落疊。至於被人威嚇簽約，就要企硬say no，必要時甚至可以報警求助。當然喇，保障消費者權益，官老爺責無旁貸，執法部門除咗收到投訴後要做嘢，亦可以考慮主動出擊，查實網上有唔少關於黑店嘅討論，只要按圖索驥上門放蛇，拉人封舖話都冇咁易。
不良店舖呃呃騙騙，一粒老鼠屎攪壞成鍋粥，正當商人一樣冇好日子過。呢，藥房投訴不絕如縷，有人建議藥劑業及毒藥管理局日後喺考慮藥房發牌或續牌時，將藥房過往嘅投訴紀錄列入考慮，亦有人建議消委會定期點名譴責問題藥房，對於呢啲辣招，業界舉腳贊成。好簡單啫，一為神功，二為弟子，掃除行業敗類，重建顧客信心，對大家都有好處。
點講都好喇，家陣香港旅遊業已經走下坡，再任由消費陷阱害人，「好客之都」遲早變「劏客之都」，想搵人嚟都幾難喇！