政情：公民講場：財爺論跌市一時一樣

全球多個股市近日輪流大跌，其中港股尋日就一度急跌逾千二點，最後收市亦跌逾千一點。財政司司長曾俊華喺收市後急急會見記者，意圖穩定人心，但結果就好似愈講愈混亂。記者用中文問佢今次算唔算係全球金融危機，即係好似九八年嘅亞洲金融風暴同○八年嘅金融海嘯咁，鬍鬚曾就笑笑口咁話「已經發生咗喇！」不過，當記者之後再用英文問多佢一次，佢就改口話全球股市雖然大跌，但佢唔會用Financial Crisis嚟形容。Financial Crisis嘅中文，之唔係「金融危機」囉！一時一樣都唔知佢想點。