政情：黑英呻空氣差累到阿媽咳血
空氣污染真係可大可小，記得早前天文台前台長林超英（黑英）喺網誌狂呻，今個月八號本港錄得開埠以來最高溫嗰日，佢去咗佐敦、油麻地一趟，結果街邊廢氣令佢每吸一下就咳一下。點知件事原來仲有下文。
病況失控 住院至今
黑英前日繼續喺網誌發牢騷，話八號嗰日佢見空氣咁差，於是打電話畀阿媽提佢唔好出街。可惜呢個電話打得太遲，黑英阿媽當日去咗晨運，空氣差刺激其呼吸道舊患，搞到連續咳咗幾日，而且痰中帶血絲，後來甚至咳血失控而需要住院，至今仍未出院。
黑英話，空氣污染確實危害健康，長者同長期病患者尤其受到衝擊，所以香港同整個華南區域需要大力合作，由源頭開始減少空氣污染咁話。