區議會選舉即將舉行，唔少佔領行動後嘅「傘兵」都話要落區參選，傳統泛民大黨民主黨（白鴿黨）就同呢班傘兵撞到應一應。白鴿黨副主席尹兆堅話，泛民已協調約二百人出選，但有十四個區同傘兵撞區，當中白鴿黨就佔咗八個。
傘兵組織青年新政早前話，希望透過初選決定邊個出選。尹兆堅就擺明反對，話搞初選隨時得百幾人投票，唔夠代表性，亦可能被建制派動員左右結果，最弊係選舉經費使咗一大半，到真正選舉時就少咗資源喎！
尹兆堅批評傘兵冇政治智慧，咁佢哋會唔會覺得傘兵係「鬼」呢？白鴿黨副主席羅健熙扮客氣話，唔會咁樣形容佢哋，不過有少少政治邏輯嘅人，都知多過一個泛民出選結果必然不利。尹兆堅就明言咁發展落去，對方「無形中會變成建制B隊」。
講番區選，白鴿黨將派九十四人出選，比今屆大跌兩成九。當中最年輕係打算出選西貢富君選區、廿一歲嘅陳展浚。羅健熙話今次要行「精兵制」，以保住現有議席四十四席為目標，增減最多一至兩成，即係最差有機會跌至三十五席。條數咁計，唔知係咪為咗力保兩個超級區議會提名資格呢？