政情：吳永順「背負歷史」現身學會活動
一向打扮時尚嘅建築師學會會長吳永順，尋日突然戴住條掛有三十幾條銀色金屬條嘅紅底頸帶現身公開場合，睇落頗為老土。原來嗰啲銀條喺歷任學會會長嘅名牌，佢身為現任會長，每次出席學會官式活動都要戴住，名副其實係「背負歷史」。佢承認條帶都幾重，有啲活動成兩個鐘咁耐，都好吃力吓。問佢會唔會搞到周身骨痛，佢笑言隨着年齡增長，唔戴都腰痠骨痛啦！
「睇唔到理由取消電車」
對於近日有人向城規會建議取消部分電車路段，向來重視歷史嘅吳永順認為電車係香港多年嘅文化、特色，係珍貴嘅資產，睇唔到有任何理由要取消，如果話電車阻路，暗示提出建議嘅人已經攞晒足夠曝光。
對於星光大道擴建計劃引起爭議，身兼海濱事務委員會主席嘅吳永順表示，康文署同有關發展商，今年初亦有向委員會簡介擴建計劃，委員會認為原則上可以接受，但強調當時仲未有詳細建築設計，建議依家應再提交委員會討論。佢又話，日後任何有關海濱嘅發展計劃，如有私人參與就應該進行招標，咁就可以令社會更加信服。