政情：工記橫額遭惡搞玩埋發叔
建制派於六一八表決政改方案時，因「等埋發叔」甩轆收場。原本建制派狠批泛民為否決政改元兇，仲製作橫額周街懸掛，點知呢個如意算盤打唔響，工聯會一款以陳婉嫻、黃國健等議員名義出街嘅「後政改」橫額，大字標題「認清普選殺手」近日終於「被惡搞」，由原本目標係投下政改反對票嘅泛民，畀人改頭換面至主角為鄉議局前主席劉皇發（發叔），話佢嘅歷史罪責冇得走，認真係人算不如天算！
工聯會於政改表決「甩轆」後，於全港多區懸掛一幅橫額，大字標題為「認清普選殺手」，副題是「廿八票否決普選，泛民歷史罪責冇得走」，同時附上一個持槍的黑影人像，中間有放大鏡照出是「泛民」兩個字，旨在批評泛民係令香港失去普選嘅殺手。
原本呢款橫額都好搶眼，而且訊息清楚易明，絕對係選舉前聲討泛民、提醒選民票債票償嘅強而有力攻勢之一，之不過政改「甩轆」事件發生後，據聞部分建制派即時收韁，避免用普選殺手、票債票償等口號，費時畀機會泛民借題發揮揶揄「甩轆」一事。
仿製品幾可亂真
不過，要發生嘅始終都無可避免。近日網上流傳一張懸掛於街上，有工聯會標誌嘅改圖橫額，大字標題同樣有「認清普選殺手」，最吸睛嘅副題被改為「投票拉隊走，發叔歷史罪責冇得走」，而原本黑影人像亦變成劉皇發嘅肖像，放大鏡照出亦是「發叔」兩個字，如果唔細心睇，真係會以為工聯會向發叔開火，狠批對方先係普選殺手。
黃國健怒鬧「無聊」
黃國健接受查詢時火氣十足，批評惡搞橫額「無聊、低莊」，透露曾有其他議員問及惡搞橫額係咪工聯會所為，佢表明佢哋唔會咁做，如果發叔一方問到就會作出解釋。佢其後更進一步話，如找到該惡搞橫額確實位置會報警處理喎！
一句到尾，如果建制派無「甩轆」收場，就無人有機會可以反客為主惡搞橫額，依家先再出招避免惡搞橫額繼續蔓延，似乎有多少被人牽住鼻子走嘞！